సెప్టెంబర్ 3 నుండి పొలం పిలుస్తోంది కార్యక్రమం : జిల్లా కలెక్టర్ రాజకుమారి గణియా.

ఏపీ టుడే న్యూస్ బ్యూరో నంద్యాల సిటీ.

రాష్ట్ర ప్రభుత్వ ఆదేశాల మేరకు వచ్చే నెల 3 నుండి జిల్లాలో పొలం పిలుస్తోంది కార్యక్రమం చేపడుతున్నట్లు జిల్లా కలెక్టర్ జి. రాజకుమారి పేర్కొన్నారు. శుక్రవారం కలెక్టరేట్ లోని తన ఛాంబర్ లో పొలం పిలుస్తోంది కార్యక్రమ గోడపత్రికను వ్యవసాయ, వ్యవసాయ అనుబంధ రంగాల అధికారులతో కలిసి ఆవిష్కరించారు.
ఈ సందర్భంగా జిల్లా కలెక్టర్ జి. రాజకుమారి మాట్లాడుతూ రాష్ట్ర ప్రభుత్వ ఆదేశాల మేరకు సెప్టెంబరు 3 నుండి జిల్లా వ్యాప్తంగా పొలం పిలుస్తోంది కార్యక్రమం చేపట్టాలని వ్యవసాయ, వ్యవసాయ అనుబంధ రంగాల అధికారులను ఆదేశించారు. ప్రతి మంగళవారం, బుధవారం వ్యవసాయ అధికారులు రైతుల వద్దకు వెళ్లి నూతన పద్ధతులు, సేంద్రియ వ్యవసాయం, ఆధునిక వ్యవసాయ సాగు పద్ధతులు, పంటల మార్పిడి, ఎరువుల వాడకం తదితర వాటిపై వివరించి రైతులకు అవగాహన కల్పించేందుకు చర్యలు తీసుకోవాలన్నారు. రైతులు వేసిన పంటలపై అధిక దిగుబడులు సాధించేలా సలహాలు, సూచనలు ఇవ్వాలని కలెక్టర్ సూచించారు. జిల్లా వ్యవసాయ అధికారి మురళీకృష్ణ, ఉద్యాన శాఖ అధికారి నాగరాజు, పశుసంవర్ధక అధికారి గోవింద నాయక్, మార్కెటింగ్ ఏడి రెహమాన్, వ్యవసాయ సాంకేతిక అధికారి అయూబ్ బాషా తదితరులు పాల్గొన్నారు.