నాణ్యత ప్రమాణాల మేరకు అభివృద్ధి పనులు చేపట్టండి. * ప్రజారోగ్య విభాగం అధికారులకు ఎంపీ పుట్టా మహేష్ కుమార్ ఆదేశం..

ఏలూరు/ఎపీ టుడే న్యూస్ మార్చి 8: ప్రభుత్వం మంజూరు చేసిన నిధులతో ప్రారంభించే అభివృద్ధి పనులను నాణ్యత ప్రమాణాల మేరకు చేపట్టాలని ఎంపీ పుట్టా మహేష్ కుమార్ మున్సిపల్ కార్పొరేషన్ ప్రజారోగ్య విభాగం అధికారులను ఆదేశించారు. ఏలూరు మున్సిపల్ కార్పొరేషన్ ప్రజారోగ్య విభాగం డీఈ ఫణిభూషణ్, ఇతర అధికారులు శనివారం స్థానిక క్యాంపు కార్యాలయంలో ఎంపీ మహేష్ కుమార్ ను కలిసి ప్రస్తుతం జరుగుతున్న అభివృద్ధి పనులను వివరించారు. ఆయా అభివృద్ధి పనులపై అధికారులతో సమీక్షించిన ఎంపీ మహేష్ కుమార్ పలు సూచనలు చేశారు. పదికాలాల పాటు మన్నాల్సిన అభివృద్ధి పనుల విషయంలో నాణ్యతా ప్రమాణాలు పాటించాలని సూచించారు. నాణ్యత విషయంలో ఏమాత్రం రాజీ పదవద్దని, నాసిరకంగా జరుగుతున్నాయనే ఫిర్యాదులు వస్తే మాత్రం ఉపేక్షించేది లేదని హెచ్చరించారు. కాంట్రాక్టర్లు లెస్ కు వేసిన టెండర్లు ఏవైనా ఉంటే తక్షణం వాటిని రద్దు చేసి, తిరిగి టెండర్లు పిలవాలని సూచించారు.